چشم خوباں خامشی میں بھی نوا پرداز ہے
سرمہ تو کہوے کہ دود شعلۂ آواز ہے
پیکر عشاق ساز طالع نا ساز ہے
نالہ گویا گردش سیارہ کی آواز ہے
دست گاہ دیدۂ خوں بار مجنوں دیکھنا
یک بیاباں جلوۂ گل فرش پا انداز ہے
چشم خوباں مے فروش نشہ زار ناز ہے
سرمہ گویا موج دود شعلۂ آواز ہے
ہے صریر خامہ ریزش ہائے استقبال ناز
نامہ خود پیغام کو بال و پر پرواز ہے
سرنوشت اضطراب انجامی الفت نہ پوچھ
نال خامہ خار خار خاطر آغاز ہے
نالۂ دل نغمہ ریزاں ہے بہ مضراب خیال
رشتۂ پا یاں نوا سامان بند ساز ہے
شرم ہے طرز تلاش انتخاب یک نگاہ
اضطراب چشم برپا دوختہ غماز ہے
شوخی اظہار کو جز وحشت مجنوں اسدؔ
بسکہ لیلائے سخن محمل نشین راز ہے
English
Related writings
ہم موت بھی آئے تو مسرور نہیں ہوتے – فانی بدایونیUrdu Classicsفانی بدایونی
جب کسی نے حال پوچھا رو دیا – شاد عظیم آبادیUrdu Classicsشاد عظیم آبادی
کچھ اکیلی نہیں مری قسمت – شبلی نعمانیUrdu Classicsشبلی نعمانی
بیٹھا ہوں پاؤں توڑ کے تدبیر دیکھنا – یگانہ چنگیزیUrdu Classicsیگانہ چنگیزی
وہ جی گیا جو عشق میں جی سے گزر گیا – فانی بدایونیUrdu Classicsفانی بدایونی
ہر گھڑی انقلاب میں گزری – فانی بدایونیUrdu Classicsفانی بدایونی



