رات کے بارہ بج کر چالیس منٹ
بس خالی ہے
صرف ایک لڑکی
پچھلی سیٹ پر
سوئی ہوئی ہے
آخری اسٹاپ آتا ہے
میں انجن بند نہیں کرتا
آئینے میں دیکھتا ہوں
اس کے جوتے
ہسپتال والے ہیں
ہاتھ پر
کسی کا لکھا ہوا فون نمبر
آدھا مٹ چکا ہے
اصول کہتا ہے
اسے جگا دوں
میں دو منٹ اور رک جاتا ہوں
بس
اتنا جتنا
میری ماں رک جاتی تھی
جب میں
بھروچ کی دوپہروں میں
اسکول سے آ کر
بستے پر سر رکھ کر سو جاتا تھا
پھر میں آہستہ سے
دروازہ کھولتا ہوں
ٹھنڈی ہوا اندر آتی ہے
وہ جاگتی ہے
شرمندہ ہو کر “سوری” کہتی ہے
میں کہتا ہوں
“نو ورریز، لَو، گھر پہنچ کر آرام کرنا”
اور سوچتا ہوں
اس جملے کا
اردو ترجمہ
میری ماں کی آواز ہے
