পুৰণি অসম

অসম বিক্ৰম হেতু আহোম ৰজাৰ,
“অসম” সি জাতি নাম জগতে প্ৰচাৰ।
ৰজাৰ খিতাপ পিন্ধি ৰাজ্য বিভূষিত,
ৰাজ নামে ৰাজ্য নাম প্ৰথা প্ৰচলিত।
স্বাধীন নিচান তাৰ উৰিছিল শিৰে,
অখণ্ড প্ৰতাপ চিন্‌ চাৰিটি দুৱাৰে।
বিষয়াৰ বংশধৰে ৰাজ প্ৰসাদৰ,
উপাধি পাগুৰি মাৰে বংশ-গৌৰৱৰ।
আজিও বাঢ়িছে তাৰ আদৰ অভাৱ,
নাই ৰজা, গুচা নাই উপাধি প্ৰভাৱ।
বিতোপন বাট, খাট, দেউল, মন্দিৰে
অক্ষয় কীৰিতি চিন্ জগতে প্ৰচাৰে।

থাকোঁতে সৌভাগ্য ভাগ নেভাবিলে হাঁয়,
সুৱঁৰি এতিয়া কান্দে অসমীয়া ভাই!