ফটিকৰ ধাৰ যেন নিজনি বিলত,
কোমল পদুম পাহি,
কেনেকৈ ভাহিছে!
ময়লাত উৰি অহা প্ৰেমৰ গীতটি
একে থৰে শুনি শুনি,
কেনেকৈ হাঁহিছে!
দেহি ঐ কেনেকৈ জিলিঙনি কিটি,
সৰু ঢৌ কেইটিৰ বোকোচাত উঠি,
পদুমৰ মুখ চাই, কি যেন ফটিকা খাই,
ঢলি ঢলি লৰি আহি
সাবতি ধৰিছে।
এটাইকিটিয়ে কেনে আলফুল কৰি
মুখতে লগাই মুখ
মৰম কৰিছে।
মলয়া বতাহ হৈ ময়ো যেন গৈ,
পদুমৰ কাণে কাণে,
সি গীতটি গাম;
ঢৌটিতে উঠি যেন জিলিঙনি হৈ,
ময়ো যেন তেনেকৈয়ে,
চুমা এটি খাম।
আলফুল কৰি যেন বুকুত শুৱাই
টোপনিতে লালকাল মুখ খনি চাম।
কিন্তু মই কি যে হুতাশন,
দেখিলেই হব মোক এটাইটি লীন;—
বতাহ নবলা হব,
ঢৌকিটি মাৰ যাব,
জিলিঙনিকিটি গৈ লুকাব মেঘত,
লাজুকী লতাৰ দৰে পদুম পাহিয়ে
লাজে সোতমোট খাই,
মুখখনি গহিনাই,
তেতিয়াই তুলি লব ওৰণি মূৰত।
Assamese · অসমীয়া
Related poems
তেজীমলা – লক্ষ্মীনাথ বেজবৰুৱালক্ষ্মীনাথ বেজবৰুৱা- আসাম বুৰঞ্জী — প্ৰথম অধ্যায় (অংশ ২) – গুণাভিৰাম বৰুৱাগুণাভিৰাম বৰুৱা
- প্ৰথম কীৰ্ত্তন (চতুৰ্ব্বিংশতি-অৱতাৰ-বৰ্ণন) – শ্ৰীমন্ত শংকৰদেৱশ্ৰীমন্ত শংকৰদেৱ
- তেজৰে কমলাপতি পৰভাত নিন্দ – মাধৱদেৱমাধৱদেৱ
- জোনাকীৰ প্ৰতি সম্বোধন – কমলাকান্ত ভট্টাচাৰ্যকমলাকান্ত ভট্টাচাৰ্য
- জাতীয় সঙ্গীত – হেমচন্দ্ৰ গোস্বামীহেমচন্দ্ৰ গোস্বামী
