دل کو درد آشنا کیا تو نے
درد دل کو دوا کیا تو نے
طبع انساں کو دی سرشت وفا
خاک کو کیمیا کیا تو نے
وصل جاناں محال ٹھہرایا
قتل عاشق روا کیا تو نے
تھا نہ جز غم بساط عاشق میں
غم کو راحت فزا کیا تو نے
جان تھی اک وبال فرقت میں
شوق کو جاں گزا کیا تو نے
تھی محبت میں ننگ منت غیر
جذب دل کو رسا کیا تو نے
راہ زاہد کو جب کہیں نہ ملی
در مے خانہ وا کیا تو نے
قطع ہونے ہی جب لگا پیوند
غیر کو آشنا کیا تو نے
تھی جہاں کارواں کو دینی راہ
عشق کو رہنما کیا تو نے
ناؤ بھر کر جہاں ڈبونی تھی
عقل کو ناخدا کیا تو نے
بڑھ گئی جب پدر کو مہر پسر
اس کو اس سے جدا کیا تو نے
جب ہوا ملک و مال رہزن ہوش
بادشہ کو گدا کیا تو نے
جب ملی کام جاں کو لذت درد
درد کو بے دوا کیا تو نے
جب دیا راہرو کو ذوق طلب
سعی کو نارسا کیا تو نے
پردۂ چشم تھے حجاب بہت
حسن کو خود نما کیا تو نے
عشق کو تاب انتظار نہ تھی
غرفہ اک دل میں وا کیا تو نے
حرم آباد اور دیر خراب
جو کیا سب بجا کیا تو نے
سخت افسردہ طبع تھی احباب
ہم کو جادو نوا کیا تو نے
پھر جو دیکھا تو کچھ نہ تھا یا رب
کون پوچھے کہ کیا کیا تو نے
حالیؔ اٹھا ہلا کے محفل کو
آخر اپنا کہا کیا تو نے
English
Related writings
نہ دل اپنا نہ غم اپنا نہ کوئی غم گسار اپنا – شاد عظیم آبادیUrdu Classicsشاد عظیم آبادی
مزہ گناہ کا جب تھا کہ با وضو کرتے – یگانہ چنگیزیUrdu Classicsیگانہ چنگیزی
اپنی جنت مجھے دکھلا نہ سکا تو واعظ – فانی بدایونیUrdu Classicsفانی بدایونی
جب کسی نے حال پوچھا رو دیا – شاد عظیم آبادیUrdu Classicsشاد عظیم آبادی
سلسلہ چھڑ گیا جب یاسؔ کے افسانے کا – یگانہ چنگیزیUrdu Classicsیگانہ چنگیزی
دل کی طرف حجاب تکلف اٹھا کے دیکھ – فانی بدایونیUrdu Classicsفانی بدایونی


