انداز کچھ اور ناز و ادا اور ہی کچھ ہے
جو بات ہے وہ نام خدا اور ہی کچھ ہے
نہ برق نہ خورشید نہ شعلہ نہ بھبھوکا
کیوں صاحبو یہ حسن ہے یا اور ہی کچھ ہے
بلور کی چمکیں ہیں نہ الماس کی جھمکیں
اس گورے سے سینے کی صفا اور ہی کچھ ہے
پیچھے کو نظر کی تو وہ گدی ہے قیامت
آگے کو جو دیکھا تو گلا اور ہی کچھ ہے
سینے پہ کہا میں نے یہ دو سیب ہیں کیا ہیں
شرما کے یہ چپکے سے کہا اور ہی کچھ ہے
تم باتیں ہمیں کہتے ہو اور سنتے ہیں ہم چپ
اپنی بھی خموشی میں صدا اور ہی کچھ ہے
ہیں آپ کی باتیں تو شکر ریز پر اے جاں
اس گونگے کے گڑ میں بھی مزا اور ہی کچھ ہے
پوچھی جو دوا ہم نے طبیبوں سے تو بولے
بیماری نہیں ہے یہ بلا اور ہی کچھ ہے
عناب نہ خطمی نہ بنفشہ نہ خیارین
اس ڈھب کے مریضوں کی دوا اور ہی کچھ ہے
ہم کو تو نظیرؔ ان سے شکایت ہے جفا کی
اور ان کا جو سنیے تو گلہ اور ہی کچھ ہے
English
Related writings
یادش بخیر جب وہ تصور میں آ گیا – جگر مراد آبادیUrdu Classicsجگر مراد آبادی
جب کسی نے حال پوچھا رو دیا – شاد عظیم آبادیUrdu Classicsشاد عظیم آبادی
جب حسن بے مثال پر اتنا غرور تھا – یگانہ چنگیزیUrdu Classicsیگانہ چنگیزی
لے کے خود پیر مغاں ہاتھ میں مینا آیا – شاد عظیم آبادیUrdu Classicsشاد عظیم آبادی
اسیر جسم ہوں میعاد قید لا معلوم – شاد عظیم آبادیUrdu Classicsشاد عظیم آبادی
اب بھی اک عمر پہ جینے کا نہ انداز آیا – شاد عظیم آبادیUrdu Classicsشاد عظیم آبادی


