دل کو کیا ہو گیا خدا جانے
کیوں ہے ایسا اداس کیا جانے
اپنے غم میں بھی اس کو صرفہ ہے
نہ کھلا جانے وہ نہ کھا جانے
اس تجاہل کا کیا ٹھکانا ہے
جان کر جو نہ مدعا جانے
کہہ دیا میں نے راز دل اپنا
اس کو تم جانو یا خدا جانے
کیا غرض کیوں ادھر توجہ ہو
حال دل آپ کی بلا جانے
جانتے جانتے ہی جانے گا
مجھ میں کیا ہے ابھی وہ کیا جانے
کیا ہم اس بد گماں سے بات کریں
جو ستائش کو بھی گلہ جانے
تم نہ پاؤ گے سادہ دل مجھ سا
جو تغافل کو بھی حیا جانے
ہے عبث جرم عشق پر الزام
جب خطاوار بھی خطا جانے
نہیں کوتاہ دامن امید
آگے اب دست نارسا جانے
جو ہو اچھا ہزار اچھوں کا
واعظ اس بت کو تو برا جانے
کی مری قدر مثل شاہ دکن
کسی نواب نے نہ راجا نے
اس سے اٹھے گی کیا مصیبت عشق
ابتدا کو جو انتہا جانے
داغؔ سے کہہ دو اب نہ گھبراؤ
کام اپنا بتا ہوا جانے
English
Related writings
سلامت رہیں دل میں گھر کرنے والے – یگانہ چنگیزیUrdu Classicsیگانہ چنگیزی
کچھ کہے جاتا تھا غرق اپنے ہی افسانے میں تھا – شاد عظیم آبادیUrdu Classicsشاد عظیم آبادی
زمانے پر نہ سہی دل پہ اختیار رہے – یگانہ چنگیزیUrdu Classicsیگانہ چنگیزی
زندگی جبر ہے اور جبر کے آثار نہیں – فانی بدایونیUrdu Classicsفانی بدایونی
جینے کی ہے امید نہ مرنے کا یقیں ہے – فانی بدایونیUrdu Classicsفانی بدایونی
بیٹھا ہوں پاؤں توڑ کے تدبیر دیکھنا – یگانہ چنگیزیUrdu Classicsیگانہ چنگیزی


