ناروا کہئے ناسزا کہئے
کہئے کہئے مجھے برا کہئے
تجھ کو بد عہد و بے وفا کہئے
ایسے جھوٹے کو اور کیا کہئے
درد دل کا نہ کہئے یا کہئے
جب وہ پوچھے مزاج کیا کہئے
پھر نہ رکئے جو مدعا کہئے
ایک کے بعد دوسرا کہئے
آپ اب میرا منہ نہ کھلوائیں
یہ نہ کہئے کہ مدعا کہئے
وہ مجھے قتل کر کے کہتے ہیں
مانتا ہی نہ تھا یہ کیا کہئے
دل میں رکھنے کی بات ہے غم عشق
اس کو ہرگز نہ برملا کہئے
تجھ کو اچھا کہا ہے کس کس نے
کہنے والوں کو اور کیا کہئے
وہ بھی سن لیں گے یہ کبھی نہ کبھی
حال دل سب سے جا بجا کہئے
مجھ کو کہئے برا نہ غیر کے ساتھ
جو ہو کہنا جدا جدا کہئے
انتہا عشق کی خدا جانے
دم آخر کو ابتدا کہئے
میرے مطلب سے کیا غرض مطلب
آپ اپنا تو مدعا کہئے
ایسی کشتی کا ڈوبنا اچھا
کہ جو دشمن کو ناخدا کہئے
صبر فرقت میں آ ہی جاتا ہے
پر اسے دیر آشنا کہئے
آ گئی آپ کو مسیحائی
مرنے والوں کو مرحبا کہئے
آپ کا خیر خواہ میرے سوا
ہے کوئی اور دوسرا کہئے
ہاتھ رکھ کر وہ اپنے کانوں پر
مجھ سے کہتے ہیں ماجرا کہئے
ہوش جاتے رہے رقیبوں کے
داغؔ کو اور با وفا کہئے
English
Related writings
تیس دن کے لئے ترک مے و ساقی کر لوں – شبلی نعمانیUrdu Classicsشبلی نعمانی
یار کو رغبت اغیار نہ ہونے پائے – شبلی نعمانیUrdu Classicsشبلی نعمانی
ناتواں عشق نے آخر کیا ایسا ہم کو – شبلی نعمانیUrdu Classicsشبلی نعمانی
نام بدنام ہے ناحق شب تنہائی کا – فانی بدایونیUrdu Classicsفانی بدایونی
جو طوفانوں میں پلتے جا رہے ہیں – جگر مراد آبادیUrdu Classicsجگر مراد آبادی
چراغ زیست بجھا دل سے اک دھواں نکلا – یگانہ چنگیزیUrdu Classicsیگانہ چنگیزی



